Maanso Cusub oo La Yadhaahdo “Hooyo” Waxana Curiyay Abwaan Muxamad Siciid Cilmi ( Muude )

Maanso Cusub oo La Yadhaahdo “Hooyo” Waxana Curiyay Abwaan Muxamad Siciid Cilmi ( Muude )

Magaca Eebe ayaan ku bilaabayaa ee naxariis guud iyo mid gaaraba naxariista.

Marka xigta salaantii Muslimka kaliya uu geyo u mudnayd salaamaha (Asalaamu Caleykum)

Waxa aan salaan gaar ah salaamayaa dhamaan howl wadeenada Shabakada: Camuudnews

Iyo akhristayaasha ku xidhan

Maansadan waxa aan curiyay taariikhdu markii ay ahayd 29-01-2013 Dareenka iga keenay inaan curiyaana runtii waa ku uuqof walba dareemo oo ah Hooyo jaceyl.

Maansaduna waxay tidhi

Qofkaan ku dhex abuurnaa

Bilo iyo Ayaamaha

Qof aan dhiiga qaybsanay

Qofkaan u diidee hurdada

Umul iyo dhib iyo silic

Baryo aan la jiifiyay

Qof Islaamka aan ahay

U ahayd yaduba sobob

Qofkaan dunida Aamino

Qof aan nolosheeda ahay

Qof aan i nacayn intaan jiro

Qofkaan abid rabin dhibkay

Qof dhabteeda aan laday

Qof jaceylka bare u ah

Qofka samirku eegtee

Ku dayduu ilaashado

Qof barbaarintayda iyo

Adaabtaan ku noolahay

Afka aan adeegsado

Ii biilowday socodkaba

Qof aan ooyo xiisaheed

Runtii Hooyo waa adi

Astaanta Nabadaa tahoo

Amaantaba dhamaan

Idaylkii hadal murti leh

Wanaag adigaa istaahila

***** ******

Waanadaad i tidhi baan

Ilaashaa ku noolahay

Amarkaad i siisaan

Fuliyaa awooday

Adaa Talo Ilaahay

Saaro oo jeclow yidhi

Haka quusan aayaha

Raxmaan keena Al Raxiim

Adigaa i yidhi samir

Adigaa i yidhi oog

Arkaanta diinteena oo

Adaa wadadii Muxamad (csw)

Xabiibkii eego yidhi

Ka aamus fidnadaad i tidhi

Qabyaalada aasta khayr

Adaa ha u galin i yidhi

Ogow qaraabadaad i tidhi

Qofkii da’da kaa in badan

Ixtiraam waayeelkaad i tidhi

Adaa haka aarsan yidhi

Intii qaladka kaa gala

Codsana adigaa i yidhi

Cafiska iyo raali gelin

Gaf markii aad gaysato

Inkastoon qaldama oo

Ibnu Aadam aan ahay

Dadkaba Iblays baa hodee

Al Qafuur baan Towbada

Naftaydani u celiyaa

****** ******

Hadaan cilmi iyo aqoon

Caalim sheekha aan ahay

Hadaan helo maal aduun

Hadaan odoyoobo iyo

Hadaan reero badan alkumo

Hadaan madax ahay mudane

Hadaan geesi iyo fariid

Ahaado sharaftiyo ilays

Adiga ilmaan kuu ahoo

Ilaah baan ku dhaartaye

Adigaa i maamuli

Intaad dunida nooshahay

***** *****

Hadaan doqon ahay la naco

Hadii aan dantayda gabo

Hadii uu xiskaygu tago

Hadaan wadadaba ag maro

Haduu aragaygu lumo

Hadaan awoodayda gabo

Hadaan il dariyo xanuun

Imtixaan Rabi iiga dhigo

Waxan ogahay hooyooy

Ilaah baan ku dhaartaye

Intaad adigu nooshahay

Astura adaa ii ahaan

***** *****

Asluub san adigaa i baray

Dumarka adigaan dartaa

Caydaba ugu quudhahayn

Wanaaga aad Gashiyo

Inaad tahay cibaado khayr

Inaad tahay Fure janeed

Axmed Nabigeeniibaa (csw)

U sheegay umadiisa dhami

Hooyooy abaalkaaga badan

Erayo kuma gudi karee

Waxaan dhaar Ilaah ku maray

Intaan duni ku noolahay

Sadaqo inaan kuu baxshoo

Aakhiro kuu geeyo ajar

Ducada aan kuu Akhriyo

Awooday Insha Alaah

Aabana sidoo kale.

Muxamad Siciid Cilmi ( Muude )


This post has been viewed 1140 times.

Leave a Reply

%d bloggers like this: